மதுரை மாவட்டம் சாப்டூர் அருகே மேற்கு தொடர்ச்சி மலைப் பகுதியில் சதுரகிரி மகாலிங்கம் கோயில் அமைந்துள்ளது. இந்த கோயிலிற்கு விருதுநகர், தேனி ஆகிய மாவட்டங்களில் இருந்தும் நேரடியாக செல்லலாம்.
இந்த மலைப் பகுதியில் மகாலிங்கம், சுந்தரமூர்த்தி லிங்கம், சந்தன மகாலிங்கம், இரட்டை லிங்கம், காட்டு லிங்கம் ஆகிய கோயில்கள் அமைந்துள்ளன. ஆண்டுதோறும் ஆடி அமாவாசை, தை அமாவாசை, சிவராத்திரி நாளையொட்டி சதுரகிரி மகாலிங்கம் கோயிலிற்கு ஏராளமானோர் வந்து செல்வர்.
இந்த மலைப் பகுதிகளில் அபூர்வ மூலிகைகள் இருப்பதாக சொல்லப்படுகிறது. எனவே இங்கு தங்கி மக்கள் மருத்துவமும் பார்த்து வருகின்றனர். இந்த சூழலில் வரும் 27ஆம் தேதி வரை பிரதோஷம், அமாவாசை வழிபாட்டிற்காக சதுரகிரி மலைக்கு செல்ல பக்தர்களுக்கு அனுமதி வழங்கப்பட்டிருந்தது.
இந்நிலையில் மேற்குத் தொடர்ச்சி மலைப்பகுதியில் நேற்று பெய்த கனமழையால் ஓடைகளில் நீர்வரத்து அதிகரித்தது. நேற்று இரவு பல மணி நேரம் மழை வெளுத்து வாங்கியது.
இதனால் சதுரகிரி மலைக்கு செல்லும் வழியில் உள்ள மாங்கனி ஓடை, சங்கிலிப் பாறை, வழுக்குப் பாறை உள்ளிட்ட ஓடைகளில் நீர்வரத்து அதிகரித்தது. எனவே 2வது நாளாக பக்தர்கள் சதுரகிரி மலைக்கு செல்ல தடை விதித்து வனத்துறை உத்தரவிட்டுள்ளது.
